Khawlum pawh kha a dai vek!

 

Ningani tlai a ni a, ka thianpa u te inneihna hmanpui tur chuan Durtlang atangin an khaw lam pan chuan kan kal   a. Ka phur em em a ni, a chhan chu tu emaw ka lo duh ve tawh em em thin te khua kan tlan pelh dawn vang a ni. An khaw thuthmun a kan awm lai chuan thingpui in chawlh neih ka rawt ta a, heipawh hi chulai hmun chu ka status duh vang a ni.

Status ah chuan ka hmang ta , tu emaw khan alo chhan ngei beisei deuhin ka upload-a . Ka duanlawk ang ngei chuan ka status chu a rawn reply ta a le. Rei tawh tak inbe tawhlo mah ila ani chuan minlo la ngaihsak ve reng thin ang mai hian a awm a. An in ka han tlawh leh tlawhloh te chu min zawt a. Kei chuan ka tlawhloh thu in ka chhang leh mai a. Ani chuan kan haw hun tur te min zawt pah chuan kan haw lama an ina leng kawi tur chuan min sawm a. Ka phur ngei mai phat pawh pha der hman eihlo chuan ka ‘aw’ ta hmiah a. Inrinni ah haw paha tlawh ngei chu kan tum ta a ni.

Zirtawpni tlai a ni a, kan zin chha

n ber inneih chu a hun a zo ta.Haw phei lehlam chiah kha ka rilru ah a awm tawh. Ka thianpa chhungte’n Pathianni hmang tura min ngenna te pawh chu ka bengah a lut thei tawhlo. Inrinni a haw paha kan chawlh pheina tur te chiah chuan ka rilru an luah khat tawh a. Ngaihzawng nei hlim ang mai, ka za zek zek  mai a ni. Hetianga ka hlim viau tawh hi chuan khap daih hret ka ngai \hin reng a ni.

Inrinni tuk ka tho te chu ka zang vah vah khawp mai. ‘Heti em em hian a ni maw zing thawh hi alo nawm’, te ka ti rilru a. Chaw kan ei vat a, keichuan haw chiah kha ka ngaihtuah tawh. Ka thianpa chhungte pawh chuan kan haw tur chu  min rawn vai liam a. Kan haw ta a!

 Ka tlan chak phei ngei mai kan haw lam chu. Tlan te kha ava sawt tak! Khati em em khan khaw kar kawng te ho kha alo inhnaih tih ka hre lo re re. Thlen pawh kan thleng phei hma reng a, duhai kan thleng phei hma deuh tihmai loh chu.

Kan thleng hma bawk aniang , kan thleng tih amah han hrilh chuan mak alo ti. Mikhual an neih thu leh zingah an vawk an lo talh thu minlo hrilh a, ka luh ngam leh ngam loh chu min lo zawt nghal bawk a. Keichuan inti pa tak chuan ‘Ngam e’ kan lo ti ve mai bawk a . Mahse ka chhungril ah tak tak chuan ka ngam teuhlo.An thenawm ah chuan hostel kan awm laia kan junior ni thin te an awm a, chumi te inah chuan kan  thu chawl leh ringawt a.Ka thianpa ber, ka kalpui pa chuan dawih minti in min hmusit tan tawh khawp mai a. Ka hel rei khawp mai. Phur  em em si khan , an inah tak chuan ka lo lut ngam tak tak miahlo. A tawpah chuan hostel-a kan junior thin nen chuan kan  chho tlang ta a.

An in kawt chu kan han thleng ta! Min hmelhriat loh hmel takin a chhungte chuan min rawn en deuh hu a, mak pawh min tih hmel hle. Kan va luh chuan kan va kal chhan ber chu hmuhtur alo awm mai lova. Mahse, a chhungte chuan ko nghal ve bawk a. Alo insu chu niin , a rawn phei nghal a, nui suk pah chuan , ‘ I dam thin maw ?’  ti a, keichuan , ‘Dam e’ ka lo ti ve mai bawk a.Mak deuh chu khua kha a lum hle ania, a hmel ka  hmuh chiah khan khaw lum te kha a dai sawng sawng hian ka hria! Thlifim te chu a rawn thaw heuh heuh a, vai film- a changtupa leh changtunu te an zai dawn a thli rawn thaw ang mai hian ka’n suangtuah zui nghal zat a.

Amah chu alo la ngai reng a, a tawngkam te, a sam dah duhdan te, a inhak dante pawh chu, ka hriat hnuhnun ber ang tho kha ala ni a, danglana a neih ka hrelo , a that belh tih chauh mai loh chu! Tichuan khawlum tihdaih nan tiin dawnfawh min zai sak a, min rawn pe a. Mahse keichuan dawnfawh kha min pe miahlo mahse, khua kha a dai nuam ka ti tawk tawh viau a ni. Ka thianpa sawi dan takah dawnfawh min pek pawh kha ka lo dih thelh ani awm e. Haw kan han tum mai a, min han chelh der ve a, ka indang zo leh  thlawt lo, kan thu muang leh ta nge nge a. Chawhnu her alo nih chuan haw chu ngai ka ti tan ta a, la awm chak viau mah ila , kan haw na tur ngaihtuah nen , kan thleng tlai lutuk ang tih ka hlauh avangin kan haw ta a. An kawtchhuah thleng min rawn thlah a. Kan haw pah chuan ka thianpa bulah chuan, ‘Eng nge a ang i tih ?,’ka ti a ni chuan, ‘Mahni phutawk hi an awm,’tih chauh hian min chhang a, hei hian a tha a tih ve zia a sawi niin a ka ngai. Achhan chu keimah zawk tak hi min fak ngailoh vang a ni.Tichuan kan haw thleng veleh ta mai a.Zankhua chuan chhun a ka thil tawn te chu ka ngaihtuah let a ,ka hlim hle a, ka hlim lutuk  chu ka mu leh theilo titih zawk hial a ni.